السبت، 10 أكتوبر، 2009

المعركة صعبة لكن مش مستحيلة .. احنا بدأنا ومش هاننجح الا بمشاركة أكبر عدد من زمايلنا .. ولازم يبقى نفسنا طويل

مظاهرة حركة حقى بجامعة القاهرة، ضد إلغاء محاضرات الانتساب
من مظاهرة الأربع اللي فات في جامعة القاهرة - حركة حقي

يوم الأربع اللي فات (7-10-2009) كان فيه تجمع قامت بيه حركة حقي بمشاركة أكثر من 250 طالب انتساب

وكان فيه مظاهرة لفت الجامعة كلها

وكان فيه حملة جمع توقيعات تجاوزت الألف ونصف توقيع

وكان فيه صحافة موجودة بتصور وبتكتب

وبرامج تليفزيون زي (الحياة اليوم) استضافت مداخلات من طلبة الانتساب

وجات تاني يوم الخميس الضهر وصورت معانا وقولنا انه الجامعة فيها أماكن تكفي محاضراتنا وتفيض

وان الادارة لو كانت خايفة علينا من الأنفلوانزا كانت على الأقل حطت صابونه واحدة في أي حمام من حمامات الجامعة!!!

ودلوقتي بنجمع ورق قانوني وبنوكل محاميين علشان نرفع قضية على وزارة التعليم العالي ورئيس الجامعة علشان يتلغي القرار ... ولسه

لمعلومات أكثر زوروا مدونة حركة حقي
www.hakycairo.blogspot.com
أو اتصلوا بينا على
0161413163


حركة حقي السنتين اللي فاتوا خاضت معركة صعبة مع الادارة لانتزاع الحق في الكتاب الجامعي المدعم ونسقت مع كل الأطراف والتيارات الطلابية الأخرى وتم تتويج هذا التنسيق بمظاهرة واضراب جزئي عن الدراسة في 6 ابريل الماضي مما أجبر الادارة على عقد مؤتمر مع الطلاب حضرنا فيه بقوة وأصررنا على انتزاع قرار بدعم الكتاب الجامعي وبالفعل نجحنا في ذلك واسألوا زمايلنا في كلية تجارة على أسعار الكتب اللي نزلت من 30و40 جنيه الى 5 جنيه

لكن طبعاً الإدارة ماكانتش هاتسيبنا أبداً نحتفل بالنصر ده من غير ماتنكد علينا بقرار الغاء محاضرات الانتساب اللي هو في الحقيقة مش علشان يحمونا من الأنفلوانزا لكن علشان يمهدوا لإلغاء نظام الانتساب ككل

والفرصة بتاعتهم ان السنة اللي جاية مافيش سنة أولى هاتدخل الجامعة علشان السنادي مافيش 3 ثانوي بسبب اختراع سنة 6 ابتدائي اللي طلعوا بيه من كام سنه

ده غير ان الوزير صرح في أكتر من مناسبة عن نية الوزارة لالغاء نظام الانتساب لكن اللي مش بيقوله طبعاً ان مصاريف الانتساب بعد مايتحول لتعليم مفتوح هاتتجاوز ال2000جنيه في السنة

ده غير الكتب والمراجعات اللي هانضطر ناخدها علشان ماعادش لينا محاضرات لحد ما نتحول للتعليم المفتوح السنة اللي جاية
أو لو هايبقى فيه محاضرات هاتبقى كلها متجمعة في يوم الجمعة يعني حوالي12 ساعة محاضرات..وابقوا قابلوني اذا فهمنا حاجة بعد المحاضرة الثالثة بالكتير اذا سيبنا القرار ده يتطبق

الحل ان احنا ننظم نفسينا وكل واحد فينا يشوف هو هايقدر يساعد في أنهي جزء من الحملة اللي حركة حقي ابتديتها وبنتمنى إن كل طلاب الانتساب يشاركونا

احنا موجودين كل يوم من الساعة 12 ظهراً عند تمثال سياسة واقتصاد
عدوا علينا وكلمونا على التليفون اللي مكتوب في أول البوست فوق

نتمنى نقابلكم ابتداءً من بكره
سلام

0 اترك تعليق Comments: